** ----- ಕಾಡಹಾದಿ ----** ಒಂದು ವಾರದ ಹಿಂದೆ ನಾನು, ಹಮೀದ್ ಹಾಗೂ ರಕ್ಷಿತ್ ಬ್ಯಾಗ್'ಗೆ ನೀರಿನ ಬಾಟಲ್ ನಾಲ್ಕು ಪ್ಯಾಕೆಟ್ ಬಿಸ್ಕೆಟ್'ನ್ನು ತುಂಬಿಕೊಂಡು ಸೂರ್ಯನ ಪ್ರಖರತೆ ಹೆಚ್ಚಾಗುವ ಮುನ್ನವೇ ಪಶ್ಚಿಮ ಘಟ್ಟದ ಕಾಡೊಳಗೆ ಟ್ರೆಕ್ಕಿಂಗ್ ಎಂಬ ನಾಮದೊಂದಿಗೆ ಹೆಜ್ಜೆ ಹಾಕಿದೆವು. ಮುಗಿಲನ್ನೇ ಚುಂಬಿಸಲು ಹೊರಟಿರುವ ಬೃಹತ್ ಮರಗಳು, ಚಪ್ಪರ ಹಾಕಿದಂತಿರುವ ಮರಗಳ ನಡುವೆ ಹರಸಾಹಸ ಮಾಡಿ ಸೂರ್ಯನ ಕಿರಣಗಳು ಭುವಿಯನ್ನು ಚುಂಬಿಸುವಾಗ, ಕಾಡೊಳಗೆ ರಂಗೋಲಿಗೆ ಚುಕ್ಕೆ ಇಟ್ಟಂತೆ ಹರಡಿರುವ ಬೆಳಕು. ನಾವಿಡುವ ಪ್ರತಿ ಹೆಜ್ಜೆಯನ್ನು 150ಮೀ. ದೂರದಲ್ಲಿಯೇ ಗುರುತಿಸುವಂತೆ ಹಾದಿ ತುಂಬಾ ತರೆಗೆಲೆಗಳು. ನಾವು ಮಾತಾಡುತ್ತಾ ಕಾಡಿನ ಹಾದಿಯ ಜಾಡು ಹಿಡಿದು ಹೊರಟೆವು. ಮುಂದೆ ಹೋದಂತೆ 2 ದಿನದ ಹಿಂದಷ್ಟೇ ಆನೆ ಬಂದು ಹೋಗಿರುವ ಗುರುತಿಗೆ ಸಹಿ ಹಾಕಿದಂತೆ ಲದ್ದಿ ಹಾಕಿತ್ತು. ಈ ಹಮೀದ್ ಅಲ್ಲಿಂದ ಆನೆಯ ಬಗ್ಗೆ ಮಾತಾಡೋಕೆ ಶುರು ಮಾಡಿದ್ರು. ಯಾಕೆಂದ್ರೆ ನಮ್ಮಲ್ಲಿ ಹೇಳಿಕೊಳ್ಳದಿದ್ದರು ಅವರಿಗೆ ಮನಸ್ಸಿನೊಳಗೆ ಸ್ವಲ್ಪ ಫುಕ್,ಫುಕ್ ಆಗಿತ್ತು ಅನ್ಸುತ್ತೆ. ಯಾಕೆಂದರೆ ದಾರಿಯುದ್ದಕ್ಕೂ ಅದರ ಚೇಷ್ಟೆಗೆ ಸಣ್ಣ ಮರಗಳು ಧರೆಗೆ ಉರುಳಿದ್ದವು. ಮುಂದೆ ಹಾದಿ ಕಡಿದಾಗುತ್ತ ಹೋದಂತೆ ಎರಡ್ಮೂರು ಕಡೆ ದಾರಿಗೆ ಅಡ್ಡಲಾಗಿ ಮಲಗಿದ್ದ ಮರವನ್ನು ದಾಟಿಕೊಂಡು ಹೋದೆವು. ಜಿಗಣೆಗಳ ಬಗ್ಗೆ ಅರಿವಿದ್ದುದ್ದರಿಂದ ಸ್ವಲ್ಪ ತಂಬಾಕು...